ഇടവേളയ്ക്ക് ശേഷം ഇറാൻ - യു.എസ് പോര് രൂക്ഷമാകുന്നു: ഗൾഫിലെ യു.എസ് താവളങ്ങൾ ലക്ഷ്യമിട്ട് മിസൈൽ-ഡ്രോൺ ആക്രമണം
ബഹ്റൈനെ ലക്ഷ്യമാക്കിയുള്ള ഇറാന്റെ ഡ്രോണുകളെ വിജയകരമായി പ്രതിരോധിച്ചതായി നാഷനൽ കമ്യൂണിക്കേഷൻ സെന്‍റർ അറിയിച്ചു. ഇറാനിൽ നിന്നുള്ള ഡ്രോൺ, മിസൈൽ ആക്രമണങ്ങളെ വിജയകരമായി പ്രതിരോധിച്ചുകൊണ്ടിരിക്കുന്നതായി കുവൈത്ത് ആംഡ് ഫോഴ്സസ് ജനറൽ കമ്മാൻഡ് അറിയിച്ചു. ഏതെങ്കിലും സ്ഫോടന ശബ്ദങ്ങൾ ശത്രുവിന്‍റെ ഡ്രോണുകളും മിസൈലുകളും പ്രതിരോധിക്കുന്നതിന്‍റേതാണ് ആണെന്നും വ്യക്തമാക്കി. ഔദ്യോഗിക കേന്ദ്രങ്ങളിൽ നിന്നുള്ള സുരക്ഷ നിർദേശങ്ങൾ ജനങ്ങൾ പാലിക്കണമെന്നും നിർദേശിച്ചിട്ടുണ്ട്.
ബഹ്റൈനും കുവൈത്തിനുമൊപ്പം ഇറാഖിലും ജോർദനിലും ഇറാൻ ആക്രമണം നടത്തി. ജോർദനിലെ യു എസ് വ്യോമ, നാവിക താവളങ്ങളെ ലക്ഷ്യം വെച്ച് 13 ബാലിസ്റ്റിക് മിസൈലുകൾ ഇറാൻ ഉപയോഗിച്ചതായി ജോർദൻ അറിയിച്ചു. ഇതിൽ 10 എണ്ണത്തെയും വിജയകരമായി പ്രതിരോധിച്ചു. മൂന്നെണ്ണം വിജന പ്രദേശങ്ങളിലാണ് പതിച്ചതെന്നാണ് വിശദീകരണം. ഇറാഖിൽ ഇർബിലിലെ യു.എസ് സൈനിക കേന്ദ്രത്തിന് നേരെയാണ് ഇറാൻ ആക്രമണം നടത്തിയത്.ചൊവ്വാഴ്ച അർധരാത്രി യു.എസ് സൈന്യം ഇറാനിലെ വിവിധ കേന്ദ്രങ്ങളിൽ നടത്തിയ ആക്രമണത്തിന് മറുപടിയായാണ് യു.എസ് കേന്ദ്രങ്ങളെ ലക്ഷ്യം വെച്ചതെന്ന ഐ.ആർ.ജി.സി അറിയിച്ചു.
തെക്കുകിഴക്കൻ ഇറാനിലെ സിസ്താൻ,കൊനാരക്, ചാബഹാർ നഗരങ്ങളിൽ അടക്കമാണ് യു.എസ് ആക്രമണം നടത്തിയത്. ഹോർമോസ്ഗാനിലെ ജാസ്ക് നഗരത്തിനും ഖിഷം ദ്വീപിനും നേർക്ക് ആക്രമണം നടന്നിട്ടുണ്ട്. അമേരിക്ക നടത്തിയ ആക്രമണത്തിൽ ഒരു മിസൈൽ പതിച്ചത് വിവാഹ ആഘോഷ ചടങ്ങ് നടന്ന സ്ഥലത്താണെന്ന് ഇറാൻ മാധ്യമങ്ങൾ റിപ്പോർട്ട് ചെയ്തു. കുട്ടി ഉൾപ്പെടെ നാല് പേർ ഈ ആക്രമണത്തിൽ കൊല്ലപ്പെട്ടു. 50 ലധികം പേർക്ക് പരിക്കേറ്റിട്ടുമുണ്ട്.ഹോർമുസ് കടലിടുക്കിൽ കടൽമൈനുകൾ സ്ഥാപിക്കാനുള്ള ഇറാന്റെ ശ്രമത്തിന് മറുപടിയായ രണ്ട് ദിവസമായി നടത്തുന്ന ആക്രമണങ്ങളെന്ന് അമേരിക്കൻ പ്രസിഡന്‍റ് ഡോണൾഡ് ട്രംപ് വ്യക്തമാക്കി.ഇറാനെതിരായ ഏറ്റവും വലിയ ആക്രമണം ഇപ്പോഴും ആരംഭിച്ചിട്ടില്ലെന്നും ട്രംപ് പറഞ്ഞു. അതേസമയം, അമേരിക്ക ഒരിക്കലും മറക്കാത്ത മറുപടിയായിരിക്കും ഇറാന്റെ ഭാഗത്ത് നിന്നുണ്ടാകുകയെന്ന് ഇറാൻ പരമോന്നത നേതാവ് ആയത്തുല്ല മുജ്തബ ഖാംനഇ പറഞ്ഞു. സംഘർഷം പുനരാരംഭിച്ച ശേഷം ആദ്യമായാണ് ഇറാൻ പരമോന്നത നേതാവ് പ്രതികരിച്ചത്.
ന്യൂസ്‌റൂം വാർത്തകളും തൊഴിലവസരങ്ങളും മുടങ്ങാതെ ലഭിക്കാൻ ഇവിടെ ക്ലിക്ക് ചെയ്ത് വാട്സ് ആപ് ലിങ്കിൽ ജോയിൻ ചെയ്യുക
https://chat.whatsapp.com/KFKQw8nVuAOHcfI9gZiLvd
