അമേരിക്കക്കാരും ട്രംപിനെ ചീത്തവിളിക്കുന്നു,കാരണം ഇതാണ്
ഇന്ധനവില വര്‍ധന അമേരിക്കന്‍ രാഷ്ട്രീയത്തിലും ചര്‍ച്ചയാകുകയാണ്. ഒരു സര്‍വേ പ്രകാരം ഏകദേശം 48 ശതമാനം അമേരിക്കക്കാര്‍ ഇന്ധനവില വര്‍ധനയ്ക്ക് ട്രംപിനെ കുറ്റപ്പെടുത്തുന്നു. മറ്റൊരു സര്‍വേയില്‍ 43 ശതമാനം ആളുകള്‍ ഇറാനുമായുള്ള സൈനിക നടപടിയെ അനുകൂലിക്കുന്നില്ല. ഏകദേശം മൂന്നില്‍ രണ്ട് പേര്‍ യുദ്ധത്തിന്റെ ലക്ഷ്യം വ്യക്തമായി വിശദീകരിച്ചിട്ടില്ലെന്ന് അഭിപ്രായപ്പെട്ടു. ഇതോടെ അടുത്തിടെ നടക്കുന്ന അമേരിക്കന്‍ ഇടക്കാല തിരഞ്ഞെടുപ്പുകളിലും ഇന്ധനവില പ്രധാന ചര്‍ച്ചാവിഷയമാകാന്‍ സാധ്യതയുണ്ടെന്ന് നിരീക്ഷകര്‍ പറയുന്നു.
ആഗോള ഊര്‍ജ പ്രതിസന്ധി
ഹോര്‍മൂസ് കടലിടുക്ക് വഴി ദിവസേന ഏകദേശം 2 കോടി ബാരല്‍ എണ്ണ ഗതാഗതം നടക്കുന്നു. ഈ പാതയില്‍ വലിയ തടസ്സം ഉണ്ടാകുകയാണെങ്കില്‍ ആഗോള എണ്ണ വിതരണത്തില്‍ വലിയ കുറവ് സംഭവിക്കാനും അതിലൂടെ ലോകമെമ്പാടും ഇന്ധനവില കുത്തനെ ഉയര്‍ന്നേക്കാനും സാധ്യതയുണ്ട്. മിഡില്‍ ഈസ്റ്റിലെ ഈ സംഘര്‍ഷം ഇപ്പോള്‍ ഒരു പ്രാദേശിക യുദ്ധമെന്നതിലുപരി ലോക സമ്പദ്വ്യവസ്ഥയെ തന്നെ ബാധിക്കുന്ന ഊര്‍ജ പ്രതിസന്ധിയായി മാറുന്നുവെന്നാണ് വിദഗ്ധര്‍ മുന്നറിയിപ്പ് നല്‍കുന്നത്.
ഇറാന്‍ യുദ്ധത്തെ തുടര്‍ന്ന് ആഗോള എണ്ണ വിപണിയില്‍ ഉണ്ടായ അനിശ്ചിതത്വം അമേരിക്കയിലെ ഇന്ധനവില കുത്തനെ ഉയര്‍ത്തിയിരിക്കുകയാണ്. കഴിഞ്ഞ ഒരു ആഴ്ചയ്ക്കിടെ അമേരിക്കയില്‍ പെട്രോള്‍ വില ഏകദേശം 21 ശതമാനം വരെ ഉയര്‍ന്ന് ഗാലണിന് ശരാശരി 3.6 ഡോളര്‍ വരെ എത്തിയെന്നാണ് റിപ്പോര്‍ട്ടുകള്‍. ഹവായ് പോലുള്ള ചില സംസ്ഥാനങ്ങളില്‍ ഇത് 4.4 ഡോളര്‍ വരെ ഉയര്‍ന്നിട്ടുണ്ട്. ഗള്‍ഫ് മേഖലയിലെ എണ്ണ സൗകര്യങ്ങളിലേക്കും കപ്പല്‍ ഗതാഗതത്തിലേക്കും ആക്രമണ ഭീഷണി ഉയര്‍ന്നതോടെയാണ് വില വര്‍ധന വേഗം പിടിച്ചത്.
ന്യൂസ്‌റൂം വാർത്തകൾ മുടങ്ങാതെ ലഭിക്കാൻ വാട്സ് ആപ് ലിങ്കിൽ ജോയിൻ ചെയ്യുക https://chat.whatsapp.com/EgJcEGy2iTM48Z38oVu56Z
