നേപ്പാളിൽ പ്രളയക്കെടുതി രൂക്ഷം: മരണസംഖ്യ ഉയരുന്നു; മലയാളി അടക്കം നൂറുകണക്കിന് ഇന്ത്യക്കാരെ കാണാനില്ല
290 ഇന്ത്യക്കാർ ഉൾപ്പെടെ 1500-ഓളം പേരെക്കുറിച്ച് ഇപ്പോഴും വിവരമൊന്നുമില്ല. കാണാതായവരിൽ 33 പേർ മലയാളികളാണെന്ന് വിദേശകാര്യമന്ത്രാലയം സ്ഥിരീകരിച്ചു. പ്രളയബാധിത പ്രദേശങ്ങളിൽ ആശയവിനിമയ സംവിധാനങ്ങൾ പൂർണ്ണമായും തകരാറിലായതാണ് ആളുകളെ ബന്ധപ്പെടാൻ സാധിക്കാത്തതിന് പ്രധാന കാരണം.
നേപ്പാളിന് പുറമേ, ചൈനയുടെ നിയന്ത്രണത്തിലുള്ള ടിബറ്റൻ അതിർത്തി മേഖലയിലും ഇരുനൂറിലധികം ഇന്ത്യക്കാർ കുടുങ്ങിക്കിടക്കുന്നുണ്ട്. ഇവരെ സുരക്ഷിതരായി പുറത്തെത്തിക്കാനുള്ള ശ്രമങ്ങൾ പുരോഗമിക്കുകയാണ്. അതിനിടെ, ടിബറ്റിലെ മറ്റൊരു ഹിമതടാകം കൂടി കരകവിഞ്ഞൊഴുകാൻ (Glacial Lake Outburst) സാധ്യതയുണ്ടെന്നും അടുത്ത 48 മണിക്കൂർ തീവ്രജാഗ്രത പാലിക്കണമെന്നും ചൈന നേപ്പാളിന് മുന്നറിയിപ്പ് നൽകിയിട്ടുണ്ട്.
ദുരന്തത്തിൽ തകർന്ന നേപ്പാളിന് പൂർണ്ണ പിന്തുണയുമായി ഇന്ത്യ രംഗത്തുണ്ട്. കൂടുതൽ ദുരിതാശ്വാസ സാമഗ്രികളുമായി ഇന്ത്യൻ വ്യോമസേനയുടെ പ്രത്യേക വിമാനങ്ങൾ നേപ്പാളിലെത്തും. പുനരധിവാസ-നിർമ്മാണ പ്രവർത്തനങ്ങൾക്ക് ആവശ്യമായ എല്ലാ സഹായങ്ങളും ഇന്ത്യ ഉറപ്പുനൽകിയിട്ടുണ്ട്. കേന്ദ്ര സർക്കാരിന്റെ അനുമതി ലഭിക്കുന്ന മുറയ്ക്ക് രക്ഷാപ്രവർത്തനങ്ങൾക്കായി ഇന്ത്യൻ കരസേനയുടെ പ്രത്യേക സംഘവും നേപ്പാളിലേക്ക് തിരിക്കും.
ന്യൂസ്‌റൂം വാർത്തകളും തൊഴിലവസരങ്ങളും മുടങ്ങാതെ ലഭിക്കാൻ ഇവിടെ ക്ലിക്ക് ചെയ്ത് വാട്സ് ആപ് ലിങ്കിൽ ജോയിൻ ചെയ്യുക
https://chat.whatsapp.com/KFKQw8nVuAOHcfI9gZiLvd
