ജർമനിയിൽ മൂന്ന് മലയാളി യുവതികളുടെ ജീവനെടുത്ത തീപിടിത്തം: പിന്നിൽ അയൽക്കാർ തമ്മിലുള്ള തർക്കമെന്ന് റിപ്പോർട്ട്
ബുധനാഴ്ച പുലർച്ചെ പ്രാദേശിക സമയം 4.30ഓടെയാണ് അപ്പാർട്ട്മെന്റ് സമുച്ചയത്തിൽ തീപിടിത്തമുണ്ടായത്. സംഭവത്തിന് തലേദിവസം റുമാനിയൻ സ്വദേശിയും സമുച്ചയത്തിൽ താമസിക്കുന്ന ചിലരും തമ്മിൽ തർക്കമുണ്ടായിരുന്നതായാണ് റിപ്പോർട്ട്. ഇയാൾ മനഃപൂർവം തീകൊളുത്തിയതാണെന്നാണ് സംശയിക്കുന്നത്. എന്നാൽ, മരിച്ച മലയാളികളായിരുന്നില്ല ഇയാളുടെ ലക്ഷ്യമെന്നാണ് പ്രാഥമിക വിവരങ്ങൾ സൂചിപ്പിക്കുന്നത്.
അപ്പാർട്ട്മെന്റിന്റെ താഴത്തെ നിലയിലാണ് റുമാനിയൻ സ്വദേശി താമസിച്ചിരുന്നത്. തീപിടിത്തത്തിൽ മരിച്ച മലയാളികൾ ഒന്നാം നിലയിലായിരുന്നു. സംഭവത്തിൽ ഒരു മലയാളി ഉൾപ്പെടെ അഞ്ചുപേർക്ക് പരിക്കേറ്റതായും വിവരമുണ്ട്. പരിക്കേറ്റ മലയാളിയെക്കുറിച്ചുള്ള കൂടുതൽ വിവരങ്ങൾ ലഭ്യമായിട്ടില്ല.
കൊല്ലം ചെമ്മക്കാട് സ്വദേശി അഞ്ജലി ജോയി, കട്ടപ്പന സ്വദേശി നോവ സാബു, എറണാകുളം കാലടി സ്വദേശി സിവിൻ ജോണി എന്നിവരാണ് മരിച്ചത്. ഇവരുടെ മൃതദേഹങ്ങൾ നാട്ടിലെത്തിക്കാനുള്ള നടപടികൾ പുരോഗമിക്കുകയാണ്.
ജോലിയും പഠനവുമായി ബന്ധപ്പെട്ട പ്രതീക്ഷകളോടെ മാസങ്ങൾക്കുമുമ്പ് മാത്രം ജർമനിയിലെത്തിയവരാണ് മൂവരും. മക്കളെക്കുറിച്ച് വലിയ സ്വപ്നങ്ങൾ കണ്ടിരുന്ന കുടുംബങ്ങൾ അപ്രതീക്ഷിത ദുരന്തത്തിന്റെ വേദനയിലാണ്.
ജർമനിയിൽ അധ്യാപികയായി ജോലിയിൽ പ്രവേശിക്കാനുള്ള ശ്രമത്തിലായിരുന്നു അഞ്ജലി. നോവ ജിം ട്രെയിനറായി ജോലി ചെയ്തുവരികയായിരുന്നു. സുഹൃത്തായ അഞ്ജലിയെ കാണാനായി അപ്പാർട്ട്മെന്റിലെത്തിയപ്പോഴാണ് നോവ തീപിടിത്തത്തിൽ അകപ്പെട്ടതെന്നാണ് റിപ്പോർട്ട്.
സിവിൻ ജോണി ജർമനിയിലെത്തിയിട്ട് 40 ദിവസം മാത്രമേ ആയിരുന്നുള്ളൂ. പുതിയ ജീവിതം കെട്ടിപ്പടുക്കാനുള്ള ശ്രമങ്ങൾക്കിടെയാണ് മൂന്ന് മലയാളികളുടെയും ജീവൻ തീപിടിത്തത്തിൽ പൊലിഞ്ഞത്.
സംഭവത്തിന്റെ സാഹചര്യങ്ങളും തീപിടിത്തത്തിലേക്ക് നയിച്ച കാരണങ്ങളും സംബന്ധിച്ച് പൊലീസ് അന്വേഷണം തുടരുകയാണ്.
ന്യൂസ്റൂം വാർത്തകളും തൊഴിലവസരങ്ങളും മുടങ്ങാതെ ലഭിക്കാൻ ഇവിടെ ക്ലിക്ക് ചെയ്ത് വാട്സ് ആപ് ലിങ്കിൽ ജോയിൻ ചെയ്യുക
https://chat.whatsapp.com/BiNNQsir7LfDXPzQgmIZ53?s=cl&p=a&mlu=4&ilr=4
വാർത്തകൾ അറിയിക്കാനും പരസ്യങ്ങൾക്കും 52000719 എന്ന നമ്പറിൽ മാത്രം ബന്ധപ്പെടുക
