Letters obtained by TIME reveal Israel played a bigger role in the payments than Netanyahu has acknowledged. https://t.co/M1oyRf1mFl
— TIME (@TIME) October 18, 2026
How Israel Steered Qatari Payments to Gaza എന്ന ഞായറാഴ്ച പ്രസിദ്ധീകരിച്ച ഒരു ദൈർഘ്യമേറിയ ലേഖനത്തിൽ, ഗസയിലേക്കുള്ള ഖത്തറിന്റെ മാനുഷിക സഹായങ്ങളെ മുതിർന്ന ഇസ്രായേലി സുരക്ഷാ ഉദ്യോഗസ്ഥർ സ്വകാര്യമായി പിന്തുണച്ചതെങ്ങനെയെന്ന് ടൈം പത്രപ്രവർത്തകൻ എറിക് കോർട്ടെല്ലസ്സ വിശദീകരിക്കുന്നു.ഇതോടൊപ്പം ഈ സഹായ കൈമാറ്റത്തിൽ ഇസ്രായേലിന്റെ നേരിട്ടുള്ള പങ്ക് വെളിപ്പെടുത്തുന്ന ഖത്തരി നേതാക്കളുടെ കത്തുകളും ലേഖനത്തിൽ ഉൾപെടുത്തിയിട്ടുണ്ട്.
ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹുവും മറ്റ് ഇസ്രായേലി നേതാക്കളും ഖത്തർ നൽകിയ മാനുഷിക സഹായങ്ങൾ ഹമാസിനെ പിന്തുണക്കാനുള്ള ശ്രമമായി ചിത്രീകരിക്കുന്നതിനെ ഈ രേഖകൾ വെല്ലുവിളിക്കുന്നു. ടൈം റിപ്പോർട്ട് പ്രകാരം, 2012 ആയപ്പോഴേക്കും ഫലസ്തീൻ ജനതയ്ക്കുള്ള സഹായങ്ങളിൽ ഇസ്രായേലിനെ കൂടി പങ്കാളികളാകുന്ന പദ്ധതിക്ക് നെതന്യാഹു സർക്കാർ അംഗീകാരം നൽകിയിരുന്നു.ഭക്ഷണവും വൈദ്യസഹായങ്ങളും വിതരണം ചെയ്യുക, സഹായത്തിന് അർഹരായ പലസ്തീൻ കുടുംബങ്ങൾ ഏതൊക്കെയാണെന്ന് തീരുമാനിക്കുക, ഫണ്ട് വിതരണം ചെയ്യുക, വിതരണത്തിന് മേൽനോട്ടം വഹിക്കുക തുടങ്ങിയ കാര്യങ്ങളിൽ ഇസ്രായേൽ വഹിച്ച പങ്ക് വ്യക്തമാക്കുന്നതാണ് ഈ രേഖകൾ.
ഖത്തർ നൽകിയ ഈ ഫണ്ടിംഗ് ഇടപാടുകൾ “മാനുഷിക സഹായം, ഇന്ധനം, സർക്കാർ ജീവനക്കാരുടെ ശമ്പളം” എന്നിവയ്ക്കായി പ്രത്യേകം നീക്കിവെച്ചതാണെന്ന് ‘ടൈം’ (TIME) മാസികയിലെ ലേഖനം എടുത്തുപറയുന്നു. പൗരന്മാർക്ക് ആശ്വാസം എത്തിക്കുക എന്ന ലക്ഷ്യത്തോടെയാണ് ഈ ധാരണ ഉണ്ടാക്കിയതെന്ന് വ്യക്തമാക്കുന്ന “ഔദ്യോഗിക രേഖകൾ” ഖത്തർ ആവശ്യപ്പെട്ടിരുന്നതായും അതിൽ സൂചിപ്പിക്കുന്നുണ്ട്.
2012 മുതൽ ഖത്തറിൽ നിന്ന് ഗസയിലേക്ക് ഖത്തർ പണം എത്തിക്കുന്നതിന് പ്രധാനമന്ത്രി ബെഞ്ചമിൻ നെതന്യാഹുവിന്റെ സർക്കാർ സൗകര്യമൊരുക്കിയെന്നും, 2018-ഓടെ ഈ തുക 1.1 ബില്യൺ ഡോളറിലധികം ആയെന്നും ലേഖനത്തിൽ ചൂണ്ടിക്കാട്ടുന്നു.എന്നാൽ ഈ ധാരണകളെല്ലാം മറച്ചുവെച്ച്, പിന്നീട് ഹമാസിന് സാമ്പത്തിക സഹായം നൽകുന്നുവെന്ന് ആരോപിച്ച് ഇസ്രായേൽ പലതവണ ഖത്തറിനെ കുറ്റപ്പെടുത്തിയിട്ടുണ്ട്.
സെപ്റ്റംബർ 5-ന് ‘i24NEWS’-ന് നൽകിയ അഭിമുഖത്തിൽ, ഖത്തറിൽ ആക്രമണം നടത്തിയതിനെ കുറിച്ച് വീമ്പിളക്കിയ നെതന്യാഹു,അതേ അഭിമുഖത്തിൽ തന്നെ ഗസയിലേക്കുള്ള ഖത്തറിന്റെ പണമിടപാടുകളെ മാനുഷിക സഹായമെന്ന് വിശേഷിപ്പിച്ച് ന്യായീകരിക്കുകയും ചെയ്തിരുന്നു. ഇസ്രായേലിന്റെ സുരക്ഷാ ഏജൻസികളായ മൊസാദും (Mossad) ഷിൻ ബെറ്റും (Shin Bet) ആണ് ഈ സഹായം നൽകാൻ ശുപാർശ ചെയ്തതെന്നും അദ്ദേഹം അഭിമുഖത്തിൽ വിശദീകരിച്ചു.എന്നാൽ ഈ ആരോപണങ്ങൾ ഖത്തർ തള്ളി. തങ്ങൾ നൽകിയ സഹായം പലസ്തീനിലെ സാധാരണക്കാർക്ക് വേണ്ടിയുള്ളതാണെന്നും, ഇസ്രായേലുമായും അന്താരാഷ്ട്ര പങ്കാളികളുമായും ഏകോപിപ്പിച്ച സംവിധാനങ്ങളിലൂടെയാണ് അത് എത്തിച്ചതെന്നും ഖത്തർ വ്യക്തമാക്കി.
സെപ്റ്റംബർ 27-ന് ന്യൂയോർക്കിൽ വെച്ച് സിഎൻഎൻ (CNN) പ്രതിനിധി ക്രിസ്റ്റ്യൻ അമാൻപൂറിനോട് സംസാരിക്കവെ, ഖത്തർ പ്രധാനമന്ത്രിയും വിദേശകാര്യ മന്ത്രിയുമായ ഷെയ്ഖ് മുഹമ്മദ് ബിൻ അബ്ദുൽറഹ്മാൻ അൽ താനി ഇക്കാര്യം കുറേകൂടി വ്യക്തമാക്കിയിരുന്നു. ഐക്യരാഷ്ട്രസഭയുടെയും ഇസ്രായേൽ സർക്കാരിന്റെയും "പൂർണ്ണമായ ഏകോപനവും സമ്മതവും" ഇല്ലാതെ ഖത്തറിൽ നിന്നുള്ള ഒരു തുകയും ഗസയിലേക്ക് എത്തിയിട്ടില്ലെന്ന് അദ്ദേഹം അഭിമുഖത്തിൽ വ്യക്തമാക്കി.ഖത്തർ നൽകിയ പണം ഹമാസിന്റെ സൈനിക വിഭാഗത്തിന് ലഭിച്ചു എന്ന ആരോപണങ്ങളെ അദ്ദേഹം നിഷേധിച്ചു.
ഗസയിൽ ഖത്തർ നൽകുന്ന എല്ലാ സാമ്പത്തിക സഹായങ്ങളും, ഇസ്രായേൽ അധികൃതരുമായും അന്താരാഷ്ട്ര പങ്കാളികളുമായും ഏകോപിപ്പിച്ച സംവിധാനങ്ങളിലൂടെയാണ് ഫലസ്തീൻ പൗരന്മാർക്ക് എത്തിച്ചുനൽകിയതെന്ന് ഖത്തർ ഇന്റർനാഷണൽ മീഡിയ ഓഫീസ് വക്താവ് വ്യക്തമാക്കിയതായി 'ടൈം' (TIME) മാസികയിലെ ലേഖനത്തിൽ ചൂണ്ടിക്കാട്ടി.ഗസയിലേക്ക് എത്തുന്നതിന് മുൻപ്, എല്ലാ സാമ്പത്തിക സഹായങ്ങളും ഭക്ഷണസാധനങ്ങൾ, മരുന്നുകൾ, ഇന്ധനം തുടങ്ങിയവയും ഇസ്രായേൽ വഴിയാണ് കടന്നുപോയതെന്ന് സെപ്റ്റംബർ 19-ന് ഖത്തർ ഇന്റർനാഷണൽ മീഡിയ ഓഫീസ് പുറത്തിറക്കിയ പ്രസ്താവനയിലും വ്യക്തമാക്കിയിരുന്നു.
"ഖത്തർ നേരിട്ട് ഒന്നും എത്തിച്ചിട്ടില്ല; ഞങ്ങൾ സഹായം നൽകുക മാത്രമാണ് ചെയ്തത്. ഇസ്രായേൽ അധികൃതരുമായി ഏകോപിപ്പിച്ച് ഐക്യരാഷ്ട്രസഭയുടെ സംഘടനകളാണ് ഈ സഹായങ്ങൾ വിതരണം ചെയ്തത്. ഖത്തറിനെതിരെ രാഷ്ട്രീയ അജണ്ടകളുള്ള ചില വ്യക്തികളും ഗ്രൂപ്പുകളും ആരോപിക്കുന്നത് പോലെ, ഹമാസിലേക്ക് എന്തെങ്കിലും ഫണ്ട് എത്തിയിട്ടുണ്ടെങ്കിൽ, അതിന്റെ ഉത്തരവാദിത്തം ഇസ്രായേലിനാണ്; കാരണം സഹായ വിതരണത്തിന് മേൽനോട്ടം വഹിച്ചതും അതിനായുള്ള സംവിധാനം ഒരുക്കിയതും അവരാണ്," എന്നും പ്രസ്താവനയിൽ കൂട്ടിച്ചേർത്തു.ഇസ്രായേലിന്റെ രഹസ്യാന്വേഷണ ഏജൻസിയായ മൊസാദിന്റെ അന്നത്തെ ഡയറക്ടർ യോസി കോഹൻ, ഖത്തർ അമീർ ഷെയ്ഖ് തമീം ബിൻ ഹമദ് അൽ താനിക്ക് 2020-ൽ അയച്ച കത്തിൽ, ഈ പണം കൈമാറ്റങ്ങളുമായി ബന്ധപ്പെട്ട് ഇസ്രായേൽ നൽകിയ സഹകരണത്തിന്റെ വ്യാപ്തി വ്യക്തമാകുന്നുണ്ടെന്ന് 'ടൈം' (TIME) റിപ്പോർട്ട് ചെയ്യുന്നു.
"കഴിഞ്ഞ കുറച്ചു വർഷങ്ങളായി ഗസ മുനമ്പിൽ ഖത്തർ നൽകിവരുന്ന മാനുഷിക സഹായ പ്രവർത്തനങ്ങൾക്ക് ഞങ്ങളുടെ നന്ദിയും അഭിനന്ദനവും അറിയിക്കാൻ ലഭിച്ച ഒരു മികച്ച അവസരമാണിത്.ഗസ മുനമ്പിലെ മാനുഷിക സാഹചര്യം മെച്ചപ്പെടുത്തുന്നതിലും, ആ മേഖലയിൽ സ്ഥിരതയും സുരക്ഷയും ഉറപ്പാക്കുന്നതിലും ഈ മാനുഷിക പ്രവർത്തനങ്ങൾ നിർണായക പങ്ക് വഹിച്ചിട്ടുണ്ട് എന്നത് നിസ്തർക്കമാണ്" എന്ന് കോഹൻ എഴുതി.
ഫലസ്തീനികളെ ഭിന്നിപ്പിച്ചുനിർത്തുന്നതിനായി ഗസയിൽ ഹമാസ് ഭരണം നിലനിർത്താൻ നെതന്യാഹു ശ്രമിച്ചുവെന്ന് വിമർശകർ ദീർഘകാലമായി വാദിക്കുന്നുണ്ടെന്ന് 'ടൈം' (TIME) മാസികയിലെ ലേഖനം ചൂണ്ടിക്കാട്ടുന്നു. അതേസമയം, ഫലസ്തീൻ പ്രശ്നത്തിന് പരിഹാരം കാണാതെ തന്നെ അറബ് ലോകവുമായി ബന്ധം സാധാരണ നിലയിലാക്കാനുള്ള ശ്രമങ്ങളിലായിരുന്നു ഇസ്രായേൽ.
പണം കൈമാറുന്ന പ്രക്രിയയിൽ നെതന്യാഹുവിന് "നിർണായക" പങ്കുണ്ടായിരുന്നുവെന്ന് മുൻ ഇസ്രായേൽ പ്രതിരോധ ഉദ്യോഗസ്ഥരുടെ പ്രസ്താവനകളെ ഉദ്ധരിച്ചുകൊണ്ട് ലേഖനം വ്യക്തമാക്കുന്നു. ഇസ്രായേൽ ഉദ്യോഗസ്ഥർ പരസ്യമായി ഈ പണം കൈമാറ്റത്തെ വിമർശിക്കുകയും, എന്നാൽ സ്വകാര്യമായി ദോഹയോട് (ഖത്തറിനോട്) ഈ സഹായം തുടരാൻ ആവശ്യപ്പെടുകയും ചെയ്തിരുന്നുവെന്നും റിപ്പോർട്ടിൽ പറയുന്നു.ഖത്തർ, ഇസ്രായേൽ, ഐക്യരാഷ്ട്രസഭ എന്നിവ ഉൾപ്പെടുന്ന ഒരു ത്രികക്ഷി സംവിധാനത്തിലൂടെ 2018 ഒക്ടോബറിലാണ് ഈ കരാർ ഔദ്യോഗികമാക്കിയത്. അന്താരാഷ്ട്ര തലത്തിലും ഇസ്രായേലിന്റെ മേൽനോട്ടത്തിലും സഹായം വിതരണം ചെയ്യുക എന്നതായിരുന്നു ഇതിന്റെ ലക്ഷ്യം.
2018 ഒക്ടോബർ 2-ന്, ഗാസയിലേക്ക് ഇന്ധനം എത്തിക്കുന്നതിനുള്ള സാമ്പത്തിക സഹായം നൽകുന്നതിനായി ഖത്തറും ഇസ്രായേലും ഐക്യരാഷ്ട്രസഭയും ചേർന്ന് ഒരു കരാറിൽ ഒപ്പുവെച്ചു.'ടൈം' (TIME) മാസികയുടെ റിപ്പോർട്ട് പ്രകാരം, 2021 ഓഗസ്റ്റിൽ ഖത്തർ മറ്റൊരു കരാറിലും ഒപ്പുവെച്ചിരുന്നു. ഇതിലൂടെ, ഏകദേശം 1,00,000 പലസ്തീൻ കുടുംബങ്ങൾക്ക് നാല് മാസത്തേക്ക് മാസം 100 ഡോളർ വീതം നൽകുന്ന ഒരു സാമ്പത്തിക സഹായ പദ്ധതിക്കായി 40 ദശലക്ഷം ഡോളറാണ് ഖത്തർ അനുവദിച്ചത്.ഈ ചർച്ചകളിൽ യു.എസ്. ഉദ്യോഗസ്ഥരും പങ്കാളികളായിരുന്നു.
ഈ നടപടിക്രമങ്ങളെക്കുറിച്ച് അറിവുള്ള ഒരു നയതന്ത്രജ്ഞൻ 'ടൈമി'നോട് പറഞ്ഞത്, ഈ സംവിധാനം എങ്ങനെയാണ് പ്രവർത്തിക്കുന്നതെന്ന് വാഷിംഗ്ടൺ കൃത്യമായി മനസ്സിലാക്കണമെന്ന് ഖത്തർ ആഗ്രഹിച്ചിരുന്നു എന്നാണ്. കാരണം, ഈ സംവിധാനത്തിൽ തങ്ങൾക്കും പങ്കുണ്ടെന്ന കാര്യം മറച്ചുവെച്ചുകൊണ്ട്, ഹമാസിന് ധനസഹായം നൽകുന്നുവെന്ന് ഇസ്രായേൽ പിന്നീട് ഖത്തറിനെ കുറ്റപ്പെടുത്തിയേക്കാമെന്ന് അവർ ഭയപ്പെട്ടിരുന്നു.
'ടൈം' ഉദ്ധരിച്ച യു.എസ്., ഇസ്രായേൽ ഉദ്യോഗസ്ഥരിൽ നിന്നുള്ള വിവരമനുസരിച്ച്, ഗസയിൽ വൈദ്യുതി ലഭിക്കുന്ന സമയം വർദ്ധിപ്പിക്കുന്നതിനായി ഇസ്രായേലിൽ നിന്ന് വാങ്ങുന്ന ഇന്ധനത്തിനും വൈദ്യുതിക്കും ഖത്തർ പണം നൽകുകയായിരുന്നു. ഇസ്രായേലി സുരക്ഷാ ഏജൻസികളുമായി ഏകോപിപ്പിച്ചുകൊണ്ടായിരുന്നു ഈ സംവിധാനം നടപ്പിലാക്കിയത്.ഗസ മുനമ്പിലെ പദ്ധതികൾക്കായി ഖത്തർ ഐക്യരാഷ്ട്രസഭ വഴി പണം കൈമാറുകയും ഗസയിലെ ചില ദരിദ്ര കുടുംബങ്ങൾക്ക് പ്രതിമാസം 100 ഡോളർ വീതം നൽകുകയും ചെയ്തു.ഈ സഹായം സ്വീകരിക്കുന്നവരെ ഇസ്രായേൽ പരിശോധിക്കുകയും വിതരണ സംവിധാനം നിരീക്ഷിക്കുകയും ചെയ്തുവെന്ന് ക്രമീകരണത്തെക്കുറിച്ച് പരിചയമുള്ള നയതന്ത്രജ്ഞർ പറഞ്ഞു.
വേൾഡ് ഫുഡ് പ്രോഗ്രാം വഴിയാണ് ഫണ്ട് കൈമാറ്റം ചെയ്തത്, അർഹരായ കുടുംബങ്ങൾക്ക് നിശ്ചിത സ്ഥലങ്ങളിൽ സഹായം ശേഖരിക്കുന്നതിന് മുമ്പ് ഓരോ വിവരങ്ങളും ടെക്സ്റ്റ് സന്ദേശം വഴി അറിയിക്കുകയായിരുന്നു.
“പണം എപ്പോഴെങ്കിലും തെറ്റായ കൈകളിൽ എത്തിയിട്ടുണ്ടെങ്കിൽ, അത് ഇസ്രായേലികൾ കാരണമാണ്,” നയതന്ത്രജ്ഞൻ ടൈമിനോട് പറഞ്ഞു, “കാരണം അവരാണ് മുഴുവൻ കാര്യങ്ങളുടെയും മേൽനോട്ടം വഹിച്ചത്.”
ഇസ്രായേൽ തിരഞ്ഞെടുത്ത ഈ ഗുണഭോക്താക്കളിൽ എത്രപേർക്ക് ഹമാസുമായോ അല്ലെങ്കിൽ ഹമാസിൽ അംഗങ്ങളായ കുടുംബാംഗങ്ങളുമായോ ബന്ധമുണ്ടായിരുന്നു എന്നത് വ്യക്തമല്ലെന്ന് 'ടൈം' (TIME) റിപ്പോർട്ട് ചെയ്യുന്നു.2020-ൽ, കൊറോണ വൈറസ് മഹാമാരി ഗസയിൽ പടർന്നുപിടിച്ചപ്പോൾ, നെതന്യാഹുവിന്റെ ദേശീയ സുരക്ഷാ കൗൺസിലിലെ അംഗമായ ആർ. എൽ. മാവോസ്, ഇസ്രായേൽ സർക്കാർ പരസ്യമായി വിമർശനങ്ങൾ ഉന്നയിച്ചിരുന്നിട്ടും, ഖത്തർ അധികൃതരോട് പണം കൈമാറുന്നത് തുടരണമെന്ന് ആവശ്യപ്പെടുകയായിരുന്നു.
"ഖത്തറിന്റെ സാമ്പത്തിക സഹായം, അംബാസഡർ മുഹമ്മദ് അൽ-എമാദി വഴിയല്ലാതെ, മറ്റ് ഇടനിലക്കാർ വഴിയോ മറ്റ് രാജ്യങ്ങൾ വഴിയോ കൈമാറരുതെന്ന് ഞങ്ങൾ അഭ്യർത്ഥിക്കുന്നു," എന്ന് മാവോസ് എഴുതി. ഗസയുടെ പുനർനിർമ്മാണത്തിനായുള്ള ഖത്തർ കമ്മിറ്റിയുടെ ചെയർമാനെയാണ് അദ്ദേഹം ഇവിടെ പരാമർശിച്ചത്.
"ഈ മേഖലയിലെ സ്ഥിരതയും സുരക്ഷയും സംരക്ഷിക്കുന്നതിനും, നമ്മുടെ രാജ്യങ്ങളെയും ജനങ്ങളെയും തമ്മിൽ കൂടുതൽ അടുപ്പിക്കുന്നതിനുമായി നിങ്ങൾ നൽകുന്ന സഹകരണത്തെയും, തുറന്ന ചർച്ചകളെയും ഞങ്ങൾ വളരെയധികം വിലമതിക്കുന്നു," എന്ന് മാവോസ് കൂട്ടിച്ചേർത്തു.ഇടക്കാലത്ത്നെ തന്യാഹു സ്ഥാനമൊഴിഞ്ഞ ശേഷവും ഈ പരിപാടി തുടർന്നു എന്ന് 'ടൈം' (TIME) റിപ്പോർട്ട് ചെയ്യുന്നു. നെതന്യാഹുവിന്റെ പിൻഗാമിയായ നഫ്താലി ബെനറ്റ്, ഈ പരിപാടിയുടെ ഏറ്റവും കടുത്ത വിമർശകരിൽ ഒരാളായിരുന്നു എന്നത് ശ്രദ്ധേയമാണ്.
2021-ൽ അധികാരമേറ്റ ശേഷം, പണം നിറച്ച സ്യൂട്ട്കേസുകൾ എത്തിക്കുന്ന രീതി ബെനറ്റ് അവസാനിപ്പിച്ചുവെന്നും എന്നാൽ, ഖത്തറിൽ നിന്നുള്ള സഹായം ഗസയിലേക്ക് എത്തിക്കുന്നത് അദ്ദേഹം തുടർന്നുവെന്നും 'ടൈം' റിപ്പോർട്ട് ചെയ്യുന്നു.
2023 ഒക്ടോബർ 7-ന് ഹമാസ് നടത്തിയ 'ഓപ്പറേഷൻ അൽ-അഖ്സ ഫ്ലഡ്' (Operation Al-Aqsa Flood)-ന് പിന്നാലെ, വർഷങ്ങളായി പല ഇസ്രായേലി ഗവൺമെന്റുകളുടെയും സഹകരണത്തോടെ രൂപീകരിക്കുകയും പരിഷ്കരിക്കുകയും നിലനിർത്തുകയും ചെയ്തുപോന്ന ഖത്തറിന്റെ സഹായ പദ്ധതി അവസാനിച്ചതായി 'ടൈം' (TIME) റിപ്പോർട്ട് ചെയ്തു.ഗസയിൽ "അടിസ്ഥാന സേവനങ്ങൾ പുനഃസ്ഥാപിക്കുന്നതിനുള്ള" ഒരു ചട്ടക്കൂട് തയ്യാറാക്കാൻ ഖത്തർ ഇപ്പോഴും അമേരിക്കയുമായും മറ്റ് അന്താരാഷ്ട്ര പങ്കാളികളുമായും ചേർന്ന് പ്രവർത്തിക്കുന്നുണ്ടെന്ന് സൂചിപ്പിച്ചുകൊണ്ടാണ് 'ടൈം' ലേഖനം അവസാനിക്കുന്നത്.
ന്യൂസ്റൂം വാർത്തകളും തൊഴിലവസരങ്ങളും മുടങ്ങാതെ ലഭിക്കാൻ ഇവിടെ ക്ലിക്ക് ചെയ്ത് വാട്സ് ആപ് ലിങ്കിൽ ജോയിൻ ചെയ്യുക
ഇൻസ്റ്റഗ്രാം ഫോളോ ചെയ്യുക :https://www.instagram.com/newsroomme/?hl=en
https://chat.whatsapp.com/BiNNQsir7LfDXPzQgmIZ53?s=cl&p=a&mlu=4&ilr=4
വാർത്തകൾ അറിയിക്കാനും പരസ്യങ്ങൾക്കും 52000719 എന്ന നമ്പറിൽ മാത്രം ബന്ധപ്പെടുക.
