എല്ലാ ചോദ്യങ്ങൾക്കും കൃത്യമായ മറുപടിയുണ്ട്,നെതന്യാഹു യുദ്ധക്കുറ്റവാളി തന്നെയെന്ന് ഖത്തർ പ്രധാനമന്ത്രി
അഭിമുഖത്തിൽ നെതന്യാഹുവിനെ ഒരു യുദ്ധക്കുറ്റവാളിയായിട്ടാണോ കാണുന്നതെന്ന് ചോദിച്ചപ്പോൾ അൽ താനി ഇങ്ങനെ മറുപടി നൽകി: "തീർച്ചയായും, ഗാസയിൽ നടന്നത് യുദ്ധക്കുറ്റങ്ങളാണ്. അതിന് ഉത്തരവാദിയായ ആരും യുദ്ധക്കുറ്റവാളിയാണ്."അതിൽ നെതന്യാഹുവും ഉൾപ്പെടുന്നുണ്ടോ എന്ന് മോർഗൻ ആവർത്തിച്ചു ചോദിച്ചപ്പോൾ, അൽ താനി 'ഉണ്ട്' എന്ന് മറുപടി നൽകി.
ഒക്ടോബർ 7-ൽ ഹമാസ് ഇസ്രായേലിൽ നടത്തിയ ആക്രമണങ്ങളെ അദ്ദേഹം വ്യക്തമായി അപലപിക്കുകയും ചെയ്തു: "ഒക്ടോബർ 7-ന് നടന്നത് ഒരു കൂട്ടക്കൊലപാതകമായിരുന്നു എന്നതിൽ സംശയമില്ല, അത് അപലപിക്കപ്പെടേണ്ടതുമാണ്. ഇതിന് ഉത്തരവാദികളായവരെ നിയമത്തിനു മുന്നിൽ കൊണ്ടുവരികയും വേണം."-അദ്ദേഹം പറഞ്ഞു.
ഐക്യരാഷ്ട്രസഭയുടെ പൊതുസഭയിൽ നെതന്യാഹു നടത്തിയ പ്രസംഗത്തെക്കുറിച്ചുള്ള ചോദ്യത്തെത്തുടർന്നാണ് ഈ പ്രതികരണം ഉണ്ടായത്. അമേരിക്കൻ സർവകലാശാലകളിലേക്ക് കോടിക്കണക്കിന് ഡോളർ ഒഴുക്കി അമേരിക്കൻ പൊതുജനാഭിപ്രായത്തെ സ്വാധീനിക്കാൻ ഖത്തർ ശ്രമിക്കുന്നുവെന്ന് ഇസ്രായേൽ പ്രധാനമന്ത്രി ആ പ്രസംഗത്തിൽ ആരോപിച്ചിരുന്നു.ആരോപണങ്ങൾ തള്ളിക്കളഞ്ഞ അൽ താനി, പൊതുജനങ്ങളെ തെറ്റിദ്ധരിപ്പിക്കാനാണ് നെതന്യാഹു ശ്രമിക്കുന്നതെന്ന് കുറ്റപ്പെടുത്തി.
ഗാസയിലെ ഇസ്രായേലിന്റെ നടപടികളെക്കുറിച്ച് പ്രമുഖ വ്യക്തികളോ മാധ്യമപ്രവർത്തകരോ ഇൻഫ്ലുവൻസർമാരോ വിദ്യാർത്ഥികളോ വിമർശനം ഉന്നയിക്കുമ്പോഴെല്ലാം, സ്വന്തം സർക്കാരിന്റെ നടപടികൾ പരിശോധിക്കുന്നതിന് പകരം ഖത്തറിനെയാണ് നെതന്യാഹു കുറ്റപ്പെടുത്തുന്നതെന്ന് അദ്ദേഹം ചൂണ്ടിക്കാട്ടി.
അമേരിക്കൻ സർവകലാശാലകൾക്കായി ഖത്തർ നടത്തുന്ന ചെലവുകൾ പ്രധാനമായും ഖത്തറിലെ അവയുടെ കാമ്പസുകളെ പിന്തുണക്കാൻ ഉദ്ദേശിച്ചുള്ളതാണ്.പാഠ്യപദ്ധതിയെയോ വിദ്യാർത്ഥികളെയോ സ്വാധീനിക്കാനല്ലെന്നും ഖത്തർ പ്രധാനമന്ത്രി വ്യക്തമാക്കി. ഈ ചെലവുകളിൽ ഏകദേശം 95 ശതമാനവും ആ കാമ്പസുകൾക്ക് വേണ്ടിയാണ് വിനിയോഗിച്ചതെന്ന് അദ്ദേഹം പറഞ്ഞു.
'സത്യത്തിൽ അമേരിക്കൻ രാഷ്ട്രീയത്തിൽ ഇടപെടുകയും അതിൽ കൈകടത്തുകയും ചെയ്യുന്നത് ആരാണ്? ഖത്തറോ അതോ ഇസ്രായേലോ?" - ന്യൂയോർക്ക് സിറ്റി മേയർ, ഇൻഫ്ലുവൻസർമാർ, വിദ്യാർത്ഥികൾ എന്നിവർക്കെതിരെ നെതന്യാഹു നടത്തിയ വിമർശനങ്ങളെ ചൂണ്ടിക്കാട്ടി അദ്ദേഹം ചോദിച്ചു.മധ്യസ്ഥൻ എന്ന നിലയിലുള്ള ഖത്തറിന്റെ പങ്കിനെ ദുർബലപ്പെടുത്താൻ ലക്ഷ്യമാക്കി ഇസ്രായേൽ സർക്കാർ ഖത്തറിനെതിരെ വലിയ പ്രചാരണ കാമ്പയിൻ സംഘടിപ്പിച്ചുവെന്നും അൽ താനി ആരോപിച്ചു.
ന്യൂസ്റൂം വാർത്തകളും തൊഴിലവസരങ്ങളും മുടങ്ങാതെ ലഭിക്കാൻ ഇവിടെ ക്ലിക്ക് ചെയ്ത് വാട്സ് ആപ് ലിങ്കിൽ ജോയിൻ ചെയ്യുക
https://chat.whatsapp.com/BiNNQsir7LfDXPzQgmIZ53?s=cl&p=a&mlu=4&ilr=4
